Ai Zabt dekh Ishq Ki Un Ko Khabar Na Ho

ai zabt dekh ishq ki un ko khabar na ho

dil men hazar dard uthe aankh tar na ho

muddat men sham-e-vasl hui hai mujhe nasib

do-char saal tak to ilahi sahar na ho

ik phuul hai gulab ka aaj un ke haath men

dhadka mujhe ye hai ki kisi ka jigar na ho

dhunde se bhi na maani-e-barik jab mila

dhoka hua ye mujh ko ki us ki kamar na ho

ulfat ki kya ummid vo aisa hai bevafa

sohbat hazar saal rahe kuchh asar na ho

tul-e-shab-e-visal ho misl-e-shab-e-firaq

nikle na aftab ilahi sahar na ho