duniya men hai yuun to kaun be-gham
puchhe koi kyuun udaas hain ham
kya shahr ke basiyon ko ma.alum
karte hain ghazal kis tarah ram
karte rahe umr bhar vazahat
par rah ga.i baat phir bhi mub.ham
shikva to hai dusron se lekin
naraz hain apne aap se ham
har saans ke saath kar rahe hain
guzri hui zindagi ka matam
auron ki nazar men kya samate
ḳhud aap ko bhi jache nahin ham
‘rashid’ vo ghazal koi ghazal hai
gaa.e na jise ‘farida-ḳhanam’
Leave a Reply