ashk in ankhon se ham dil men baha kar dekhen
aaj sailab ko siine men chhupa kar dekhen
ek baar aur zara dil se mire khel karen
ek baar aur miri ankhon men aa kar dekhen
aap ke dil men utar ja.unga dhaḌkan ban kar
mere hathon se kabhi haath mila kar dekhen
kya ḳhabar aa.e vo jab tez hon zaḳhmon ke diye
un charaghon ki laven aur baḌha kar dekhen
barish-e-gham men hansi bhigi hui hai meri
shak agar ho to use haath laga kar dekhen
ham jise chahte hain duur se dekha hai use
ji bahut chahta hai paas bula kar dekhen
Leave a Reply