lab tak jo na aaya tha vahi harf-e-rasa tha
jis ko na main samjha tha vahi mera ḳhuda tha
main dast-e-saba ban ke use chheḌ raha tha
vo ghuncha-e-nau-ras tha abhi tak na khila tha
patthar ki tarah phuul mire sar pe laga tha
is vaqt sabhi ro.e the main sirf hansa tha
utra tha rag-o-pai men mire zahr ke manind
vo dard ki surat mire pahlu se uTha tha
mahrum rakha tha mujhe meri hi ana ne
jo uTh na saka tha vo mira dast-e-dua tha
har-chand ki nisbat to mujhe gul se rahi thi
main bu ki tarah pairahan-e-gul se juda tha
mahrumi ka ehsas raha us se na mil kar
milne pe ye ehsas magar aur siva tha
jaise koi kuchh rakh ke kahin bhuul gaya ho
is tarah azal se vo mujhe DhunD raha tha
Leave a Reply