Sardar Khan Soz
mohabbat karne vaale kab kisi ka naam lete hain
zaban ḳhamosh rahti hai nazar se kaam lete hain
vo kaise log hain yarab girate hain jo insan ko
yaqinan vo farishte hain jo baḌh kar thaam lete hain
ta.ajjub-ḳhez hai dastur yarab teri duniya ka
miTate hain jo duniya ko vahi in.aam lete hain
yahi apni ibadat hai yahi hai bandagi apni
tumhara zikr karte hain tumhara naam lete hain
jafa.en hain adavat hai sitam hai bevafa.i hai
ḳhushi se apne sar ham baḌh ke har ilzam lete hain
kahan ka nashsha mai kaisi na maiḳhane na mai-noshi
tiri ankhon ke paimanon se bhar kar jaam lete hain
tabahi ka gila tum se nahin to phir karun kis se
miri ulfat ke afsane tumhara naam lete hain
Leave a Reply