Akbar Masoom
sun! hijr aur visal ka jaadu kahan gaya
main to kahin nahin tha magar tu kahan gaya
jab ḳhema-e-ḳhayal men tasvir hai vahi
vo dasht-e-na-murad vo aahu kahan gaya
bistar pe gir rahi hai siyah asman se raakh
vo chandni kahan hai vo mah-ru kahan gaya
jis ke baghair ji nahin sakte the ja chuka
par dil se dard aankh se aansu kahan gaya
phir ḳhaak uḌ rahi hai makan-e-vajud men
ai jan-e-be-qarar vo dil-ju kahan gaya
Leave a Reply