Poet
haq jo manga to mire haath men kashkol diya
aaj us ne mire ehsas ka dar khol diya
mere honTon ko saḳhavat ke qaside de kar
har gali ja ke bajane ko mujhe Dhol diya
chun ke har ek vafa aur muravvat meri
mujh ko tahqir ki mizan men kyuun tol diya
mere luqme pe nazar aise paḌi thi us ki
zahr sa ik mire ehsas men bas ghol diya
us ghaḌi us ne miri zaat se mangi hai najat
meri hasti ki har ik shaan ko jab rol diya
ek lamhe men badal Daali hai dil ki duniya
jaane kya us ki nigahon ne mujhe bol diya
jism men ruuh ki manind sama kar us ne
ahd-e-hijran ka mujhe tohfa-e-anmol diya
Leave a Reply