Qamar Jameel
saaya nahin hai duur tak saa.e men aa.en kis tarah
ham aa ga.e hain kis taraf tum ko bata.en kis tarah
ye phuul patte chandni ye suraten man-mohni
aise men apni jankani un se chhupa.en kis tarah
aalam baharan ka sahi manzar gulistan ka sahi
basti bayaban ki sahi daman bacha.en kis tarah
jis phuul ki har pankhuḌi hoti hai moti ki laḌi
us phuul ki ḳhatir kabhi aansu baha.en kis tarah
Leave a Reply