Saya Nahin Hai Dur Tak Sae Mein Aaen Kis Tarah

saaya nahīñ hai duur tak saa.e meñ aa.eñ kis tarah

ham aa ga.e haiñ kis taraf tum ko batā.eñ kis tarah

ye phuul patte chāñdnī ye sūrateñ man-mohnī

aise meñ apnī jāñkanī un se chhupā.eñ kis tarah

aalam bahārāñ kā sahī manzar gulistāñ kā sahī

bastī bayābāñ kī sahī dāman bachā.eñ kis tarah

jis phuul kī har pañkhuḌī hotī hai motī kī laḌī

us phuul kī ḳhātir kabhī aañsū bahā.eñ kis tarah

Leave a Comment