Bhul Gaya KHushki Mein Rawani

bhuul gayā ḳhushkī meñ ravānī

dariyā meñ thā kitnā paanī

guuñj rahī hai sannāTe meñ

ek sadā jaanī pahchānī

sardī garmī bārish patjhaḌ

saarī ruteñ haiñ aanī jaanī

yādeñ haath chhuḌā letī haiñ

ho jaatī hai baat purānī

donoñ jale bhī donoñ bujhe bhī

ek hue jab aag aur paanī

phir dukh jī ko lag jaatā hai

saath nahīñ detī hairānī

añdhiyāroñ kī aadī duniyā

māñge sūraj se tābānī

ik lamha qadmoñ se lipaT kar

lauT ga.ī mauj-e-imkānī

Leave a Comment