tere rahne ko munasib tha ki chhappar hota
ki na chaukhaT tiri hoti na mira sar hota
qismat-e-najd ka gar qais commissioner hota
lady-laila ki hava-ḳhori ko motor hota
ghair mil-jul ke uTha lete ki the be-ghairat
go pahaḌ aap ke ehsan ka chhappar hota
chaa.e men Daal kar ushshaq use pi jaate
dar-haqiqat lab-e-ma.ashuq jo shakkar hota
malak-ul-maut pe jhalne ko banata main chanvar
ta.er-e-ruh ki dam men jo koi par hota
le hi leta lab-e-dildar ka bosa uḌ kar
kaash ashiq jo banaya tha to machchhar hota
Thokaren ghair ke marqad pe lagata kyuun kar
boot ki ja pe jo tu pahne slēper hota
chaTta saari kitabon ko baghair az-diqqat
ilm ka shauq jise hai jo vo jhengar hota
paas karta resolution ki hasinon pe ho tex
main kabhi municipality ka jo member hota
lucknow se shab-e-yak-shamba bareilly aate
paanv men gar na ‘zarif’ apne sanichar hota
Leave a Reply