Mohsin Naqvi
kis ne sang-e-ḳhamoshi phenka bhare-bazar par
ik sukut-e-marg taari hai dar-o-divar par
tu ne apni zulf ke saa.e men afsane kahe
mujh ko zanjiren mili hain jur.at-e-iz.har par
shaḳh-e-uriyan par khila ik phuul is andaz se
jis tarah taaza lahu chamke na.i talvar par
sang-dil ahbab ke daman men rusva.i ke phuul
main ne dekha hai naya manzar faraz-e-dar par
ab koi tohmat bhi vaj.h-e-karb-e-rusva.i nahin
zindagi ik umr se chup hai tire israr par
main sar-e-maqtal hadis-e-zindagi kahta raha
ungliyan uThti rahin ‘mohsin’ mire kirdar par
Leave a Reply