raqs-e-hasti ke phisal jaane ka andesha hai
baagh hathon se nikal jaane ka andesha hai
ab to vo sur bhi lagta hai hamara mutrib
raag jis sur pe badal jaane ka andesha hai
raat ko ḳhauf mira chand koi chhin na le
chand ko raat ke Dhal jaane ka andesha hai
buund bhar tel bacha hai to diya gul kar do
varna basti ke bhi jal jaane ka andesha hai
us ka apna koi aa ja.ega le ja.ega
aaj ruk jaa.e to kal jaane ka andesha hai
is zamin par bhi laga lenge koi peḌ ustad
haath se ye bhi ghazal jaane ka andesha hai
Leave a Reply