Safi Aurangabadi
ghaḌi bhar aaj vo mujh se raha ḳhush
ḳhuda rakkhe use is se siva ḳhush
ye main jo har tarah nashad-o-na-ḳhush
phir aise se rahe un ki bala ḳhush
kabhi ḳhush hai kabhi vo mujh se na-ḳhush
hamesha kaun duniya men raha ḳhush
tumhin tum ḳhush to phir ke lutf-e-sohbat
maza milne ka hai ho dusra ḳhush
tumhin tum ḳhush to phir kya lutf-e-sohbat
maza milne ka hai ho dusra ḳhush
ḳhushi ki mil ga.iin do-char sansen
ki vo bad-ahd aaya ḳhush gaya ḳhush
jo vo baton se ḳhush karne pe aate
to hote banda-e-dargah kya ḳhush
samajhte hain ki ye gustaḳh bhi hai
zara na-ḳhush hain vo mujh se zara ḳhush
kahan tak zabt ab karta huun naala
sitamgar ḳhush rahe mujh se ki na-ḳhush
dar-e-daulat pe the lakhon bhikari
na palTa koi mahrum aur na-ḳhush
ilahi-baḳht tu bedar-e-bada
adu na-ḳhush rahin aur ashna ḳhush
suni hai barha meri tamanna
kiya hai us ne mujh ko barha ḳhush
ḳhushi se aaj us ne baat kar li
tabi.at ho ga.i be-intiha ḳhush
karo vo kaam jo kal kaam aa.e
chalo vo chaal jis se ho ḳhuda ḳhush
ilahi daur-e-usmani ho daa.em
ki hai is ahd men chhoTa baḌa ḳhush
ḳhushi meri kisi ke haath men hai
hua ḳhush jo kisi ne kar diya ḳhush
safi’ meri ḳhushi-o-na-ḳhushi kya
rakkha jis haal men us ne raha ḳhush
Leave a Reply