Aankhon Mein Chand KHwab-Numa Tir gaD Gae

Osama Khalid

ankhon men chand ḳhvab-numa tiir gaḌ ga.e

bahte lahu ke Dar se papoTe sikuḌ ga.e

main aag ke qarib se guzra na tha kabhi

ThanDak ki narm dhuup se dhage udhaḌ ga.e

kuchh beḌiyon ne ḳhasta kiya jism-o-jan ko

manzar tak aate aate mire paanv jhaḌ ga.e

kaisi dalilen kaisi munajat kuchh nahin

tujh se bichhaḌna tha jinhen ḳhud se bichhaḌ ga.e

mangi na thi dua kabhi main ne phir ek shab

uThne ki der thi ki mire haath jhaḌ ga.e