Masoom Ansari
main bhi kya karta ki is ko bevafa hona hi tha
zindagi ko ek din mujh se juda hona hi tha
har dua ko mere haq men bad-dua hona hi tha
ab kisi se kya gila jo kuchh hua hona hi tha
apne be-ta.abir ḳhvabon ki jalan kis se kahun
is gulabi shahr ko atish-kada hona hi tha
phir bhi paani ki mujhe qimat ada karni paḌi
mere lab par tishnagi ka za.iqa hona hi tha
maut ke be-rahm hathon ko bahane ki talash
zindagi ke saath koi hadisa hona hi tha
main bahut hassas huun is men kisi ka kya qusur
aa.ina ban kar mujhe sang-ashna hona hi tha
main ne apne saare naḳhun kaaT Daale the magar
zaḳhm ko ‘ma.asum’ dobara hara hona hi tha
Leave a Reply