poet

Yusuf-E-Husn Ka Husn Aap Kharidar Raha

yusuf-e-husn ka husn aap kharidar raha

pahle bazar-e-azal misr ka bazar raha

bismil-e-naz raha Kushta-e-raftar raha

zindagi bhar mujhe marne se sarokar raha

jurm-e-na-karda uqubat ka saza-var raha

shaikh sarshar-e-siyah masti-e-pindar raha

parda-e-chashm jo pas-e-adab-e-yar raha

main raha samne tu bhi pas-e-divar raha

dil ye shadi-e-jarahat se hua balida

ki tira tiir yahan ta-lab-e-sufar raha

gir ke nazron se tiri phir na zamin se uttha

main subuk bhi jo hua tu bhi giran-bar raha

aaj hi aaj hai farda-e-qayamat maujud

do ghadi aur jo hangama-e-raftar raha

tuur tu barq-e-tajalli se hua khakistar

aur main sokhta-e-hasrat-e-didar raha

rahm us sada-dili par ki mira zakhm-e-jigar

ghair se chara-o-darman ka talabgar raha

main vo ik mujrim-e-taazir talab huun ki sada

badle dushman ke uqubat ka saza-var raha

bas-ki dil men rahi ik kashmakash yas-o-ummid

dard jo dil men raha jaan se bezar raha

ab vo farda bhi nahin rose ki taskin ke liye

ab faqat hashr hi par vaada-e-didar raha

pi bhi ja shaikh ki saaqi ki inayat hai sharab

main tire badle qayamat men gunahgar raha

khush huun chup rahne se un ke dam-e-paigham-e-visal

ki ye inkar to kuchh shamil-e-iqrar raha

sar pe phirta hi raha aur na gira mujh pe kabhi

asman ban ke tira saya-e-divar raha

garche kya kuchh the magar aap ko kuchh bhi na gina

ishq-e-barham zan-e-kashana-e-pindar raha

tum ne yuun ghar men to kya kuchh na uthae fitne

ik qayamat ka uthana sar-e-bazar raha

haae vo chashm ki dekhe tujhe sargarm-e-ada

vaae vo dil ki tira mahram-e-asrar raha

main raha bhi to raha khaar ki surat ki sada

teri nazron men subuk-dil pe tire yaar raha

chashm par nashsha-e-saqi jo rahi aks-fagan

chuur masti se har ik saghar-e-sarshar raha

huun men vo jins ki huun raunaq-e-bazar-e-kasad

huun vo sauda ki kharidar bhi bezar raha

kuchh khabar hoti to main apni khabar kyuun rakhta

ye bhi ik be-khabari thi ki khabar-dar raha

thak ke baithe ho dar-e-saumaa par kya ‘anvar’

do-qadam aur ki ye khana-e-khummar raha

More Poems

Leave a Comment