nazron se kisi ko bhi girate nahin janan
har baat raqibon ko batate nahin janan
rahte hain vo murjha.e hue mausam-e-gul men
jo log kabhi hanste hansate nahin janan
har pal tiri ankhen tiri ḳhushbu hai mire saath
ye baat magar sab ko batate nahin janan
aT sakta hai tera bhi isi dhuul se chehra
rusva.i ki yuun gard uḌate nahin janan
dil-gir to hote hain taghaful se tire ham
lekin kabhi ehsan jatate nahin janan
ye hazrat-e-‘jazib’ jo giraftar-e-vafa hain
ashiq hain magar shor machate nahin janan
Leave a Reply