rumana-rumi

Maslahat-Khu Kab Hua Hai Aaina

maslahat-khu kab hua hai aaina

sach hi sach bas bolta hai aaina

aaj mere doston ki khair ho

be-tarah mujh par mita hai aaina

ek chaukidar hai apna zamir

ik nigahban ban gaya hai aaina

ashna sirat ki khushbu se nahin

husn-e-zahir par fida hai aaina

khud-pasandi is qadar achchhi nahin

samne har dam dhara hai aaina

badla mausam mere chehre ka magar

phuul ban kar khil gaya hai aaina

tum se jab tark-e-taalluq kar liya

dil to dil mujh se khafa hai aaina

mujh se sargoshi si kar ke kaan men

mahv-e-hairat kar gaya hai aaina

kis tarah kar luun haqiqat men qubul

ik khalish si de gaya hai aina

jab bhi dekhun ru-ba-ru hai koi aur

jaise sazish kar raha hai aaina

baat dil ki ghaur se sunta hai ye

razdan mera bana hai aaina

tuut kar ‘rumi’ vo salim hi raha

mujh ko tukde kar gaya hai aaina

More Poems

Leave a Comment