dil ko taaza malal kaise ho
gham se rishta bahal kaise ho
is se pahle ki vo na pahchane
kar diya hai saval kaise ho
ham-safar tu nahin to duniya men
gardish-e-mah-o-sal kaise ho
yaad ḳhud hi bani ho nashtar jab
zaḳhm ka indimal kaise ho
aap ka jab gila nahin miTta
phir ta.alluq bahal kaise ho
hans ke tum guftugu nahin karte
phir suḳhan men kamal kaise ho
‘mir’-o-‘ghalib’ hain pasban us ke
phir ghazal ko zaval kaise ho
Leave a Reply