lahu lahu aarzu badan ka lihaf hoga
vo kitna buzdil hai aaj ye inkishaf hoga
miri har ik baat thi haqaeq ki raushni men
ye janta tha zamana mere khilaf hoga
haqiqaton ke charagh har-su jala ke rakhna
mujhe yaqin hai ki jhuut ka inetaf hoga
ye gham nahin hai shanakht apni main kho chuka huun
tumhari hasti se kab mujhe inhiraf hoga
na khoj khud ko purane kal ki kahaniyon men
purana kal to shikast ka e’tiraf hoga
hamari baton men koi pechidgi nahin hai
hamari baton se kab use ikhtilaf hoga
rumuz-e-alam pe dastaras us ko hogi hasil
vo shakhs kirdar jis ka shaffaf-o-saf hoga
saza ke dar se abas tu ghabra raha hai ‘anjum’
qusur pahla to har kisi ko muaaf hoga
Leave a Reply