Akela Din Hai Koi Aur Na Tanha Raat Hoti Hai

Ghulam Mohammad Qasir

akela din hai koi aur na tanha raat hoti hai

main jis pal se guzarta huun mohabbat saath hoti hai

tiri avaz ko is shahr ki lahren tarasti hain

ghalat number milata huun to pahron baat hoti hai

saron par ḳhauf-e-rusva.i ki chadar taan lete ho

tumhare vaste rangon ki jab barsat hoti hai

kahin chiḌiyan chahakti hain kahin kaliyan chaTakti hain

magar mere makan se asman tak raat hoti hai

kise abad samjhun kis ka shahr-ashob likhun main

jahan shahron ki yaksan surat-e-halat hoti hai