chehra dekhen tere honT aur palken dekhen
dil pe ankhen rakkhen teri sansen dekhen
surḳh labon se sabz dua.en phuTi hain
piile phulon tum ko niili ankhen dekhen
saal hone ko aaya hai vo kab lauTega
aao khet ki sair ko niklen kunjen dekhen
thoḌi der men jangal ham ko aaq karega
bargad dekhen ya bargad ki shaḳhen dekhen
mere malik aap to sab kuchh kar sakte hain
saath chalen ham aur duniya ki ankhen dekhen
ham tere honTon ki larzish kab bhule hain
paani men patthar phenken aur lahren dekhen
Leave a Reply