Lahu Se Uth Ke Ghataon Ke dil Baraste Hain

lahu se uth ke ghataon ke dil baraste hain

badan chhaton ki tarah dhuup men jhulaste hain

ham aise ped hain jo chhanv bandh kar rakh den

shadid dhuup men khud saae ko taraste hain

har ek jism ke charon taraf samundar hai

yahan ajiib jaziron men log baste hain

sabhi ko dhun hai ki shishe ke bam-o-dar hon magar

ye dekhte nahin patthar abhi baraste hain

baha ke le gaya sailab raste jin ke

vo shahr apne khayalon men ab bhi baste hain

maaal kya hai ujalon ke un dafinon ka

jinhen chhuen to andheron ke naag daste hain

ajiib log hain kaghaz ki kashtiyan gadh ke

samundaron ki bala-kheziyon pe hanste hain