Meri Diwangi Ja Kar Ye Sahraon Mein Kah Aai

Sajjad Syed

miri divangi ja kar ye sahraon men kah aa.i

tumhare kaam aa.egi ye meri abla-pa.i

saba shabnam gul-o-lala nahin kaafi gulistan men

chahakne chahchahane do to ham samjhen bahar aa.i

tumhare bin sanam har pal baḌa suuna sa lagta hai

tumhari raah takti hai mire jivan ki angna.i

saba ke dosh par jaise kali koi kahin chaTke

kisi nazuk badan ne sub.h-dam yuun li hai angḌa.i

zara sa ik lihaz-e-abru-e-ishq hai varna

mujhe ab ḳhauf-e-duniya hai na koi ḳhauf-e-rusva.i

jafaon par jafa.en vo kiye jaa.en magar ‘sayyad’

chhalak sakta nahin mera kabhi jam-e-shakeba.i