Asima Tahir
anaar kali
tere maqbare ke ahate men
kis qadar shor-o-ghul hai
main jab bhi ḳhud ko tanha udaas paati huun
aur daftari chaa.e kaafi se dil bharne lage
aḳhbar bhi almari ke kone ki zinat bane
koi kitab bhi mera dil na bahla sake
to main apne kamre kei khiḌki khole
jahan se tera maqbara saaf dikha.i deta hai
tere baare men sochti huun aur
udaas mohabbat bhari dastan men kho jaati huun
main sochti huun ki
tere maqbare ko bhi yahin par hona tha
in afsaron ke kamron aur zehnon men
filon ke siva kuchh bhi to nahin
mohabbat yahan aa kar dam toḌ jaati hai
tere aas paas kis qadar ghuTan hai
teri ḳhushbu kya kabhi kisi ko aati hogi
teri dastan kis ko yaad hogi
chaa.e ki mez par
qahqahon aur filon ke ambar men
kaun tariḳh ke in safhat ko khangalta hoga
kaun sunta hoga teri ahaTon ke saa.e yahan
magar main
aksar apne kamre ki khiḌki khole
Leave a Reply