Shakeel Haidar
mire jazbat se ye raat pighal ja.egi
jism to jism tiri ruuh bhi jal ja.egi
aaj to husn bhi maa.il hai masiha.i par
aaj se ishq ki tariḳh badal ja.egi
zindagi ret ki manind mire haath men hai
dekhte dekhte hathon se phisal ja.egi
log kahte hain hamen rasm-e-vafa yaad nahin
chhoḌiye baat kahin duur nikal ja.egi
vahshat-e-ishq ki andhi se nahin ḳhauf mujhe
ye vo andhi hai jo ash.ar men Dhal ja.egi
be-qarari hai to phir kucha-e-janan men chalo
un ke dekhe se tabi.at bhi sanbhal ja.egi
kaun karta hai raqam apne junun ka qissa
kaun kahta hai ḳhirad is se bahal ja.egi
ghuncha-e-dard ko ankhon men numu di hai ‘shakil’
ye kali ashk bahane se masal ja.egi
Leave a Reply