maimoona-abbas-khan

Jahan-Zadi Ka Status

zamana kitna badal gaya hai

maqam rishton ka mit raha hai

kahin mohabbat ka ruup dhare

kahin sulagte ye nafraton se

kahin pe ankhon men ret ban kar

chubhan ki surat rula rahe hain

kahin ye barqi payam ban kar

hazar milon pe chhai duuri ke badalon ko hata rahe hain

dilon ki dhadkan badha rahe hain

rivayaton ko badal rahe hain

vafa ke dhage jafa se har dam ulajh rahe hain

udaas lamhe khushi-o-hairat ki saari ghadiyan

dilon se bahar nikal ke divar ka navishta

mohabbat azali aziim rishta

jo lakhon pardon men jagmagata tha

ab status pe ishtiha ki khabar ki surat badal raha hai

koi bhi jazba koi bhi rishta

na mustaqil hai na mo’atabar hai

palak jhapakne men badle manzar

ki jaise koi jahan-zadi taalluq apna badal rahi ho

nai koi chaal chal rahi ho

junun ki agli jo manzilen hain

vahan pe tasviren avezan hain

dabi dabi muskurahaten hain

ghuti ghuti sansanahaten hain

junun ehsas aur mohabbat

vaqar apna mita rahi hain

bata rahi hain

zamana kitna badal gaya hai

More Poems

Leave a Comment