uThao lauh-o-qalam hadse tamam likhun
ravan sadi men hua hai jo qatl-e-am likhun
nasim-e-sub.h ibarat hai teri ḳhushbu se
saba ki narm-ravi ko tira ḳhiram likhun
ulajhti sanson ki tafsir ḳhun-chakan naghma
sukut TuuT bhi jaa.e to kis ke naam likhun
harim-e-zat farozan hai jis ke partav se
usi jhalak ko ufuq par mah-e-tamam likhun
koi to sub.h-e-rifaqat se kar sakun ta.abir
koi to shaam tire saath apne naam likhun
chhalak rahi hai subuhi qadam ki laghzish se
siyah chashm ki gardish ko daur-e-jam likhun
ajab ishare hain nichi nigah ke ‘ishrat’
vo jitne ranj bhi de ḳhud ko shad-kam likhun
Leave a Reply