Sikandar Ali Wajd
tire aate hi sab duniya javan malum hoti hai
ḳhizan rashk-e-bahar-e-javedan malum hoti hai
junun-e-sajda-rezi ka ye aalam hai ma.az-allah
har ik chaukhaT tira hi astan malum hoti hai
use har ahl-e-dil pahron maze le le ke sunta hai
miri bipta hadis-e-dil-baran malum hoti hai
kaTe hain din balaon ke sahare jin asiron ke
unhen bijli bhi shaḳh-e-ashiyan malum hoti hai
ma.al-e-zindagani ki haqiqat khul ga.i jab se
kasak dil ki mata-e-do-jahan malum hoti hai
ḳhayal-e-aish ki parchha.in se bhi dil larazta hai
nigah-e-husn ab kyuun mehrban malum hoti hai
ḳhuda shayad hai mere bhulne vaale ba-juz tere
mujhe taḳhliq-e-alam ra.egan malum hoti hai
kisi ki justuju men ‘vajd’ us manzil pe pahuncha huun
jahan manzil bhi gard-e-karvan malum hoti hai
Leave a Reply