Ghubar-E-Khatir-E-Mahfil Thahar Jae

kahin to karvan-e-dard ki manzil thahar jaae

kinare aa lage umr-e-ravan ya dil thahar jaae

amaan kaisi ki mauj-e-ḳhun abhi sar se nahin guzri

guzar jaae to shayad bazu-e-qatil thahar jaae

koi dam badban-e-kashti-e-sahba ko tah rakkho

zara thahro ghubar-e-ḳhatire-mahfil thahar jaae

ḳhum-e-saqi men juz zahr-e-halahal kuchh nahin baaqi

jo ho mahfil men is ikram ke qabil thahar jaae

hamari ḳhamushi bas dil se lab tak ek vaqfa hai

ye tufan hai jo pal bhar bar-lab-e-sahil thahar jaae

nigah-e-muntazir kab tak karegi aina-bandi

kahin to dasht-e-gham men yaar ka mahmil thahar jaae

Leave a Comment