Ye Bhi Nahin Ki Un Se Mohabbat Nahin Rahi

ye bhi nahin ki un se mohabbat nahin rahi

ye bhi hai sach ki diid ki hasrat nahin rahi

dil un ki is ada se bhi manus ho gaya

ab jaur-e-be-ruḳhi ki shikayat nahin rahi

donon badalte vaqt ke sanche men Dhal ga.e

vo dil nahin raha vo tabi.at nahin rahi

kya dekhte hain dekh ke pesh-e-nazar unhen

goya nigah men diid ki taqat nahin rahi

ab ḳhvab hi men un se mulaqat ho to ho

milne ki un ki aur to surat nahin rahi

jab kuchh na the ḳhayal tha nam-o-numud ka

ab kuchh hue to ḳhvahish-e-shohrat nahin rahi

sad-haif zarf valvala-e-dil ke bavajud

pahli si vo jasarat-o-jur.at nahin rahi

insaniyat ke naam ka charcha to hai magar

insaniyat amal se ibarat nahin rahi

dekh ai ‘rishi’ kamal-e-fusun-e-jadidiyat

ab ehtiram-e-fan ki zarurat nahin rahi