Aa Kar Phira Na Nam Ko Aankhon Mein KHwab-E-Shab

Poet

aa kar phira na naam ko ankhon men ḳhvab-e-shab

kya kya raha hai dil ko mire iztirab-e-shab

vaan us ne jam-e-mai diye ghairon ko aur yaan

chhalka kiya hai kasa-e-chashm-e-pur-ab-e-shab

manga jo ek bosa to bole ki raah lo

ik umr men diya to diya ye javab-e-shab

us ruḳh ko dekh bahr-e-ḳhajalat men kuchh na puchh

sharminda ho ke Duub gaya mahtab-e-shab

sargarm-e-naz dekh ke ghairon ke saath use

jal-bhun ke ho gaya dil-e-shaida kabab-e-shab

kal sub.h tak thiin aap ki ankhen jhuki huiin

sach kahiye kis ke haath se pi thi sharab-e-shab

zulf-e-butan ki yaad men ai ‘aish’ kya kahun

dil ne mire uTha.e hain kya pech-o-tab-e-shab