jo the haath mehndi lagane ke qabil
hue aaj ḳhanjar uthane ke qabil
anadil bhi kaliyan bhi gul bhi saba bhi
ye sohbat hai hansne-hansane ke qabil
hina ban ke main chuum luun dast-e-nazuk
tire haath hain rang laane ke qabil
javani ka ab rang kuchh aa chala hai
vo ab ho chale hain satane ke qabil
mujhe dekh kar duḳht-e-raz tan rahi hai
ye khinch kar hui hai udane ke qabil
qayamat men dekhenge kyunkar unhen ham
nahin sharm se aankh uthane ke qabil
banaen na ab us ko ab sham-e-mahfil
jala dil nahin hai jalane ke qabil
chaman men uda un ko ai bad-e-sarsar
mire tuute par hain udane ke qabil
bane shoale bijli ke qismat se meri
jo tinke the kuchh ashiyane ke qabil
budhape men sabit hue duzd-e-mai ham
na aane ke qabil na jaane ke qabil
ye kahti hai hazrat ki rish-e-hinai
‘riyaz’ ab bhi hain rang laane ke qabil