samne ik be-rahm haqiqat nangi ho kar nachti hai
us ki ankhon se ab meri maut ki khvahish jhankti hai
jism ka jaadu is duniya men sar chadh kar jab bolta hai
ruuh miri sharminda ho kar apna chehra dhanpti hai
us ki jholi men sab khote sikke daale jaenge
janti hai ye andhi bhikaran phir bhi din bhar mangti hai
mera khuun piya to us ko taaza lahu ki chaat lagi
ab vo nagin apni zaban se apna lahu bhi chatti hai
ab ki baar ai buzdil qismat khul kar mere samne aa
kyuun ik dhachka roz laga kar baaqi kal par talti hai
maazi ki turbat se nikal aati hai kisi ki yaad ki laash
meri soch miri dushman hai roz musibat dalti hai
sahra ka badal do bunden barsa kar ud jaata hai
pyasi banjar banjh zamin kuchh aur ziyada hanpti hai
ab tak soi hui thi vo asaish ke gahvare men
angdai si le kar ‘shabnam’ aaj ana kyuun jagti hai
Leave a Reply