saval ghar nahin buniyad par uthaya hai
hamare paanv ki mitti ne sar uthaya hai
hamesha sar pe rahi ik chatan rishton ki
ye bojh vo hai jise umr-bhar uthaya hai
miri ghulail ke patthar ka kar-nama tha
magar ye kaun hai jis ne samar uthaya hai
yahi zamin men dabaega ek din ham ko
ye asman jise dosh par uthaya hai
bulandiyon ko pata chal gaya ki phir main ne
hava ka tuuta hua ek par uthaya hai
maha-bali se baghavat bahut zaruri hai
qadam ye ham ne samajh soch kar uthaya hai
Leave a Reply