log hairan hain ham kyuun ye kiya karte hain
zaḳhm ko bhuul ke marham ka gila karte hain
kabhi ḳhushbu kabhi jugnu kabhi sabza kabhi chand
ek tere liye kis kis ko ḳhafa karte hain
ham to Duube bhi nikal aa.e bhi phir Duube bhi
log dariya ko kinare se taka karte hain
hain to mere hi qabile ke ye sab log magar
meri hi raah ko dushvar kiya karte hain
ham charagh aise ki ummid hi lau hai jin ki
roz bujhte hain magar roz jala karte hain
vo hamara dar-o-divar se mil kar rona
chand ham-sa.e to ab tak bhi hansa karte hain
Leave a Reply