Meraj Faizabadi
ek TuuTi hui zanjir ki fariyad hain ham
aur duniya ye samajhti hai ki azad hain ham
kyuun hamen log samajhte hain yahan pardesi
ek muddat se isi shahr men abad hain ham
kaahe ka tark-e-vatan kaahe ki hijrat baaba
isi dharti ki isi desh ki aulad hain ham
ham bhi ta.amir-e-vatan men hain barabar ke sharik
dar-o-divar agar tum ho to buniyad hain ham
ham ko is daur-e-taraqqi ne diya kya ‘me.araj’
kal bhi barbad the aur aaj bhi barbad hain ham
Leave a Reply