dagh-dehlvi

In Aankhon Ne Kya Kya Tamasha Na Dekha

in ankhon ne kya kya tamasha na dekha

haqiqat men jo dekhna tha na dekha

tujhe dekh kar vo dui uth gai hai

ki apna bhi saani na dekha na dekha

un ankhon ke qurban jaun jinhon ne

hazaron hijabon men parvana dekha

na himmat na qismat na dil hai na ankhen

na DhunDa na paaya na samjha na dekha

marizan-e-ulfat ki kya be-kasi hai

masiha ko bhi chara-farma na dekha

bahut dard-mandon ko dekha hai tu ne

ye siina ye dil ye kaleja na dekha

vo kab dekh sakta hai us ki tajalli

jis insan ne apna jalva na dekha

bahut shor sunte the is anjuman ka

yahan aa ke jo kuchh suna tha na dekha

safai hai bagh-e-mohabbat men aisi

ki bad-e-saba ne bhi tinka na dekha

use dekh kar aur ko phir jo dekhe

koi dekhne vaala aisa na dekha

vo tha jalva-ara magar tu ne muusa

na dekha na dekha na dekha na dekha

gaya karvan chhod kar mujh ko tanha

zara mere aane ka rasta na dekha

kahan naqsh-e-avval kahan naqsh-e-sani

khuda ki khudai men tujh sa na dekha

tiri yaad hai ya hai tera tasavvur

kabhi ‘dagh’ ko ham ne tanha na dekha

More Poems

Leave a Comment