Aaj Jine Ki Kuchh Ummid Nazar Aai Hai

Shamim Jaipuri

aaj jiine ki kuchh ummid nazar aa.i hai

muddaton ba.ad tiri rahguzar aa.i hai

zindagi ka koi ehsas hi baaqi na raha

zindagi le ke mujhe aaj kidhar aa.i hai

aap dekhen to zara ḳhun-e-tamanna ki bahar

kitni surḳhi miri ankhon men utar aa.i hai

kis ke pairahan-e-rangin ki mahak hai is men

aaj ye bad-e-saba ho ke kidhar aa.i hai

tu ne ḳhud tark-e-mohabbat ki qasam khaa.i thi

kyuun tiri aankh mujhe dekh ke bhar aa.i hai

ab kisi jalva-e-rangin se mujhe kaam nahin

un ki tasvir mire dil men utar aa.i hai

is men kuchh un ki jafa.en bhi to shamil hain ‘shamim’

bevafa.i ki jo tohmat mire sar aa.i hai