Dil Lagane Ki Sar-E-Am Saza Deta Hai

dil lagāne kī sar-e-ām sazā detā hai

ishq insān ko majnūñ sā banā detā hai

aisā behis huā insān ġham-e-hastī se

qissa-e-dard hañsī meñ vo uḌā detā hai

merī taqsīr kiye jaate haiñ mere apne

ik yahī ġham hai mirā dil jo dukhā detā hai

mujh ko to maut ke darvāze pe pahuñchā kar ab

kis liye pyaar se jiine kī duā detā hai

bas kiye jaatā hai takzīb magar is ke ba.ad

narm lahje se vo armān jagā detā hai

gar koī chiiz muqaddar meñ nahīñ hotī to

us kī raġhbat ko ḳhudā dil se haTā detā hai

Leave a Comment