likhegā vaqt havāoñ pe inkishāf mire
gunāh sab to nahīñ qābil-e-muāf mire
maiñ tīrgī ko kabhī raushnī nahīñ kahtā
har ahd kī hai havā is liye ḳhilāf mire
parā.e logoñ se kyā leñ samā.atoñ kī dalīl
mire gavāh bane haiñ ḳhud e’tirāf mire
paḌā hai vaqt to āñkhoñ se ho gayā ojhal
vo umr bhar ko jo kartā rahā tavāf mire
faqat tumhīñ se nahīñ hai ye iḳhtilāf mirā
ḳhud apne saath bhī ‘safdar’ haiñ iḳhtilāf mire