Tasneem Abidi
saara aalam tiri ḳhalvat men ganva baiThe hain
aks ham aankh ki hairat men ganva baiThe hain
ab kisi aur safar ke liye qaa.il na karo
zindagi saari masafat men ganva baiThe hain
ek dhaḌka hi raha tujh se bichhaḌ jaane ka
vasl ko vasl ki halat men ganva baiThe hain
dasht-e-imkan men har su hain bagule uThte
dil-e-vahshi tujhe vahshat men ganva baiThe hain
tujh se to qarz-e-tamanna bhi ada ho na saka
naqd-e-dil teri zarurat men ganva baiThe hain
chand yadon ko pas-andaz kiya tha lekin
ḳhud-faramoshi ki aadat men ganva baiThe hain
Leave a Reply