Samundar Se Gham-O-Ghussa Ke Tughyani Nahin Jati

samundar se ġham-o-ġhussa ke tuġhyānī nahīñ jaatī

shikāyat chiiz aisī hai ba-āsānī nahīñ jaatī

nigāhoñ ne na jaane us kī dekhe kaun se manzar

bahut chāhā pe āñkhoñ se ye vīrānī nahīñ jaatī

taḳhayyul dastakeñ de kar palaT jaatā hai aksar hī

anā kī jazba-e-dil par nigahbānī nahīñ jaatī

bahut mumkin hai ḳhat kā bhī tire mazmūñ badal jaa.e

abhī to bas likhāvaT hai jo pahchānī nahīñ jaatī

dil-e-be-sabr aksar ārzuoñ par machaltā hai

magar us kī kabhī ik baat bhī maanī nahīñ jaatī

koī sach ko jo kah de sach to bhārī hai tabī.at par

ki hai sunñe kī aadat zill-e-sub.hānī nahīñ jaatī

nahīñ de paa.e ham pur-amn mulk-o-qaum bachchoñ ko

yaqīñ maano na maano ye pashemānī nahīñ jaatī

Leave a Comment