saba ko le ke harim-e-chaman se nikli hai
vo ik ada ki tire bankpan se nikli hai
laja ke ḳhud se nihan ho ga.i hai phulon men
shamim-e-ḳhush ki tire pairahan se nikli hai
ba-rang-e-nur jhalakti hai mah-o-anjum men
ziya jo teri jabin ki kiran se nikli hai
latif-tar ho subuk-tar ho naz-parvar ho
mahak ye apne alava saman se nikli hai
tumhari chashm se milti hai nargis-e-shahla
shabih-e-ghuncha tumhare dahan se nikli hai
tumhin ho mojid-e-naghma tumhin ho ḳhaliq-e-sher
ravish ghazal ki tumhare chalan se nikli hai
ada-shanas-e-nigaran hamin to hain ‘az.har’
sana-e-husn ham ahl-e-suḳhan se nikli hai
Leave a Reply