ḳhvab men aae mujhe mujh se milae
mujhe sairabi-e-didar se gulzar kare
ḳhvab vo ḳhvab ki ho jis tamazat ka fusun-zad
ḳhvab vo ḳhvab ki ban jaae shikast-e-be-dad
katthai rang ghule surmai shaam men aise ki shafaq
ḳhuun ki anchon se dahak kar phaile
ate-jate hue logon ki tag-o-taz bhi
andeshon se anjan lage
jaage ḳhadshe bhi ḳhadd-o-ḳhal tamanna se huun mab.hut
har ik uzlat-e-jan shauq ki shamshir liye
phail ke sahil-e-payab ko gharat kar de
marqad-e-hila-e-be-sud mite
kuchh agar hai to mile
koi gar hai to chala aae mujhe mujh se milae
mujhe sairabi-e-didar se gulzar kare