Kahin Pe KHwab Kahin KHwab Ka Guman Nikla

kahīñ pe ḳhvāb kahīñ ḳhvāb kā gumāñ niklā

yahāñ bhī aadmī āḳhir ko be-nishāñ niklā

sanam tarāshe haiñ tū ne hī apnī marzī se

jabīn-e-shauq tirā hausla kahāñ niklā

agar azaab se nikle to ye bhī dekheñge

zamīñ ke kaun se hisse se āsmāñ niklā

guzartī shaam ke manzar pe raat hañs ke to dekh

mire lahū kā agar sho.ala-e-nihāñ niklā

Leave a Comment