raz-e-chashm-e-mai-gun hai kaif-e-mudda.a mera
ghair ki nazar se hai duur mai-kada mera
vaste ki ḳhubi ne sahl manzilen kar diin
husn ishq ka rahbar ishq rahnuma mera
kar diya mujhe be-ḳhud un ki be-niyazi ne
kah raha huun ḳhud un se dil sambhalna mera
haa.e ḳhauf-e-badnami vaa.e fikr-e-nakami
bevafa ke hathon men hasil-e-vafa mera
lutf-e-ḳhalvat-o-jalvat ham na pa sake lekin
dhuum har taraf un ki zikr ja-ba-ja mera
tarz-e-valihana ki daad kab mili mujh ko
naz-e-dost kab nikla surat-ashna mera
sochne lagegi kuchh teri ḳhush-nigahi bhi
ra.egan na ja.ega yuun hi dekhna mera
main ne jab kabhi dekha sar jhuka liya tu ne
tu ne jab kabhi dekha dil taḌap gaya mera
ishrat-e-hijab az-ḳhud charasaz-e-dil kya ho
saaz ho jab ai zalim soz-ashna mera
meri ḳhasta-hali ne sa.i-e-ḳhud-shanasi ki
un ki ḳhud-numa.i ne jab kiya gila mera
hai jo hazrat-e-‘manzur’ e’tibar-e-in-o-an
izn-e-be-ḳhudi le kar puchhiye pata mera
Leave a Reply