kaun duniya se bada-khvar utha
chashm-e-tar abr-e-nau-bahar utha
kha ke ghash gir pade khade baithe
baith kar is ada se yaar utha
atish-e-ishq dekh kar malik
al-aman al-aman pukar utha
dard tazim-e-marg ko dil men
shab-e-furqat hazar baar utha
jite-ji daur-e-asmani men
na zamin se ye khaksar utha
abr-e-rahmat ne de diya chhinta
baad marne ke jab ghubar utha
vahshat-e-dil ne phir nikale paanv
phir tahammul ka ikhtiyar utha
phir junun fasl-e-gul men laaya rang
phir main hone ko sharmsar utha
hal-e-‘bimar’ ja-e-riqqat hai
marham-e-dil ka e’tibar utha
chor zakhm-e-jigar men baith gaya
charagar ho ke sharmsar utha
Leave a Reply