Wali Alam Shaheen
yuun ulajh kar rah ga.i hai tar-e-pairahan men raat
be-dili ke saath ab utregi jan-o-tan men raat
khol kar badal ke darvaze nikal aaya hai chand
gir paḌi hai raqs karte karte phir angan men raat
baat kya hai kashtiyan khulti nahin sahil se kyuun
ḳhvar o avara si hai apne adhure-pan men raat
kaam itne hain ki ab ye sochna bhi hai muhal
kis kashakash men kaTa din kaun si uljhan men raat
luuT le jaate hain sab dhanvan din ki raushni
aur TukḌe TukḌe baT jaati hai har nirdhan men raat
kar ga.iin chhiḌkav ankhen aaj ‘shahin’ is tarah
khil uThin murjha.i kaliyon se bhare daman men raat
Leave a Reply