vo safa.i kabhi jo ham se mulaqat men thi
saaf kul saḳhtagi us ki har ik baat men thi
jo bhali aa ke kahi sehr hai samjha na use
kal buri jo kahi daḳhil vo karamat men thi
hai dil-e-ghair ko us navak-e-mizhgan se ab uns
jo ki nit apne jigar-doziyon ke ghaat men thi
sunte hain ghair se vo baat ba-avaz-e-buland
kya qayamat hai ki jo ham se isharat men thi
kya ghazab hai vahi a.ina-pan ab laakh se hai
jo safa.i kabhi ham se kisi auqat men thi
koi hajat nahin ab ghair ki jo ho na rava
ye to aage na mire qibla-e-hajat men thi
itna juya-e-mulaqat na hota tha ‘lutf’
shakl nibhne ki jo kuchh thi so musavat men thi
Leave a Reply